નવનીત સમર્પણ એપ્રિલ ૨૦૨૦ અંકની વાર્તાઓ વિષે:

નવનીત સમર્પણ એપ્રિલ ૨૦૨૦ અંકની વાર્તાઓ વિષે: (૨૫૮ શબ્દો)

રૂદાલી (પન્ના ત્રિવેદી) :

કથક એક કોલેજમાં પ્રાધ્યાપિકા છે. એક શ્યામ અને સ્થૂળ વિદ્યાર્થીની “માન ના માન, મૈ તેરા મહેમાન” ની ઢબે એની નજીક આવી જાય છે. પહેલાં ચિઠ્ઠીઓ અને પછી હિંમત વધતાં વાતચીત. સ્ટાફમાં એનું નામ પડ્યું છે રૂદાલી. જ્યારે જુઓ ત્યારે રડતી હોય. કથક જેમ જેમ એનાથી અંતર જાળવવા મથે તેમ તેમ એ નજીક આવતી જાય. કોણ છે એ છોકરી? શું છે એની સમસ્યા? શું આ સજાતીય આકર્ષણની વાત છે? રજૂઆતમાં રહસ્ય સાદ્યંત જળવાયું છે. કથક અલિપ્ત રહે છે એટલે વાર્તા લાગણીઓથી લથબથ થતી બચી ગઇ છે. કથકની સખી સંપૂર્ણ વાર્તામાં વાતાવરણ હળવું રાખે છે. છેક પરાકાષ્ઠાએ પહોંચીને રહસ્ય ઉકેલાય છે. નાયિકા, કથક અને કથકની સખી, ત્રણેનાં પાત્રાલેખનમાં વૈવિધ્ય અને ઊંડાણ.  સશક્ત વાર્તા.   

રામ રતન ધન પાયો (ગિરિમા ઘારેખાન) :

કળાની આરાધના શા માટે? શું પ્રાપ્ત કરવું છે? પૈસા, પ્રસિદ્ધિ કે કળાનું ઉચ્ચતમ શિખર? આવા કંઇક પ્રશ્નો ઊભાં કરે છે આ વાર્તા. ટેલિવિઝન પર ચાલતાં સંગીતના રિયાલીટી શો અંગે એક મહત્વનું સ્ટેટમેન્ટ લેખક આ વાર્તા દ્વારા કરે છે. અહીં ગુરુ-શિષ્યના સંબંધને પણ તપાસવામાં આવ્યો છે. સરસ વાર્તા.

સુખના દિવસો (ધીરુબેન પટેલ) :

સ્વભાવ ગમે તેવો હોય, એક માણસ બીજા માણસને ઝંખે છે. વાર્તાના નાયક કલ્યાણરાયનું કોઇ સ્વજન રહ્યું નથી, અથવા સ્વજનોથી તરછોડાયેલા છે. જેને બીજાઓ આશ્રમ કહે છે એવા “કુલીન વિશ્રાંતિગૃહ”માં કલ્યાણરાય દાતા હોવાના હક્કથી એક ઓરડા પર કબજો જમાવીને રહે છે. સંજોગવશાત બીજા એક માણસ જોડે એમણે ઓરડો વહેંચવો પડે છે. શરૂઆતમાં અણગમતો અમુલખ પછીથી કલ્યાણરાયને ગમતો થઇ જાય છે. એ કોણ છે? ક્યાંથી આવ્યો છે? બંને વચ્ચે કેવો સ્નેહસંબંધ બંધાય છે? સીધી સાદી સરળ વાર્તા.        

-કિશોર પટેલ; મંગળવાર, 31 માર્ચ 2020; 6:37 પૂર્વ મધ્યાહ્ન

###