શબ્દસૃષ્ટિ ફેબ્રુઆરી ૨૦૨૧ ની વાર્તાઓ વિષે નોંધ

(૧૯૬ શબ્દો)                                                                                                          

ટીંબો (જયંત રાઠોડ):  

કરુણાંતિકા. વીસેક વર્ષ પહેલાં કચ્છની ધરતીને ધમરોળી નાખનારા ભૂકંપની પાર્શ્વભૂમિ પર રચાયેલી વાર્તા. ભૂકંપ પછી પહેલી વાર દિલ્હીથી ધોળાવીરાની ઉત્ખનનની સાઇટ પર આવેલા સિંઘસાહેબ પાસે એક મેલોઘેલો માણસ કરગરે છે: “હજી ખોદાવો સાહેબ, હજી મડદાં નીકળશે!” સિંઘસાહેબ વિચારમાં પડે છે: ઓળખીતો જણાતો આ માણસ છે કોણ?

એ હતો જીવલો. ધોળાવીરા સાઇટનો જાણકાર. જીવલો વાકપટુ હતો. સામાન્ય મજૂર માંથી ટુરિસ્ટ- ગાઈડ બન્યો હતો. એ જીવલો એક તરફ બાપ બન્યો અને બીજી તરફ ભૂકંપમાં એકસાથે પત્ની-નવજાત શિશુ બેઉને ગુમાવી બેઠો. સિંઘસાહેબને એ કહેતો હતો જમીન ખોદાવવાની વાત. જમીનમાંથી મડદાંની સાથે બહાર નીકળવાની રાહ જોતી હતી આવી કંઇકેટલી કરુણ કથાઓ!      

સંબંધ અજાણ્યો (નીલેશ રાણા):

નાટ્યાત્મક વાર્તા. ઘરમાં ઘૂસેલા ચોરને જેર કર્યા પછી નાયિકા ચોરને પોલીસમાં આપવાના બદલે મુદ્દામાલ સાથે ભગાડવામાં મદદ કરે છે! શા માટે?

લેખકે જે નથી કહ્યું એ જ વાર્તા છે! વિદેશની ધરતી પર આકાર લેતી આ વાર્તામાં લેખકે થોડાંક સંકેત આપ્યા છે: નાયિકા માતા-પિતાના પ્રેમથી વંચિતરહી ગઇ છે. કાં તો એની માતા મૃત્યુ પામી છે અથવા પિતાથી છૂટાછેડા લીધાં છે. ગર્લફ્રેન્ડના ચક્કરમાં પિતા પોતાની દીકરીને ગુણવત્તાસભર સમય આપતા નથી!  ઘરના દાઝ્યો ગામ બાળે એ ન્યાયે નાયિકા ચોરને ઘરની કિંમતી માલમત્તા સાથે ભગાડી મૂકે છે!

--કિશોર પટેલ; 28-02-21; 13:07

###