પરબ નવેમ્બર ૨૦૨૦ અંકની વાર્તાઓ વિષે:

(૧૮૭ શબ્દો)

આ અંકની પરંપરાગત સ્વરૂપમાં કહેવાયેલી બંને વાર્તાઓ સીધી, સાદી અને સરળ છે.   

સેનેટોરિયમ (ગિરીશ ભટ્ટ) :

વાર્તાનો વિષય છે: વહેમ. ટીબી જેવો રોગ થયો હોય તેનો ઉપાય થઇ શકે પણ વહેમ શું ઉપાય? જયારે સ્વજનો જ આરોપ મૂકતાં હોય ત્યારે ક્યાં જવું?

મોટીબહેનને ટીબી થયો છે, હવાફેર માટે પહાડની સૂકી જગ્યામાં સેનેટોરિયમમાં દાખલ કરી છે, તેની સારવાર માટે જોડે નાની બહેન રહે છે.  શનિ-રવિની રજાઓમાં બનેવી ખબર લેવા આવે છે. બે રાત રોકાઇને સોમવારે પાછો જાય છે. 

ટીબીના દર્દીનો શારીરિક ઉપચાર તો થાય છે પણ એને માનસિક રોગ લાગુ પડે છે. એને વહેમ છે કે પોતાનો પતિ નાની બહેન જોડે ચક્કર ચલાવે છે. બીજી તરફ દૂર રહ્યે રહ્યે નાની બહેનના પ્રેમીને વહેમ નહીં, ખાતરી છે: “તારો તારા બનેવી જોડે અફેર થઇ ગયો છે!”

પરંપરાગત સ્વરૂપમાં સરળ વાર્તા.  

નિરાંતનો એક શ્વાસ (કંદર્પ ર. દેસાઇ) :

એક સ્વાભિમાની સ્ત્રીની સંઘર્ષકથા; દીકરીના કથનમાં માતાની કહાણી. સીધી લીટીએ ચાલનારી એક સ્વાભિમાની સ્ત્રી પોતાના ચારિત્ર્ય પર આરોપ કઇ રીતે સહી લે? પતિથી છેડો ફાડીને સ્વબળે એકલે હાથે સંતાનો ઉછેરીને ભણાવે છે. માતાની યાદો તાજી કરતાં કરતાં વાર્તા કહેવાય છે. પરંપરાગત સ્વરૂપમાં વધુ એક સરળ વાર્તા.      

--કિશોર પટેલ; શનિવાર, 07 નવેમ્બર 2020; 12:53.

###