નવનીત સમર્પણ ફેબ્રુઆરી ૨૦૨૩ અંકની વાર્તાઓ વિષે નોંધ

નવનીત સમર્પણ ફેબ્રુઆરી ૨૦૨૩ અંકની વાર્તાઓ વિષે નોંધ

(૩૨૬ શબ્દો)

ગુલાબી હવા (પન્ના ત્રિવેદી):

નારીચેતનાની વાર્તા.

સંબંધોમાં સ્પષ્ટતા. માનસી અને સંજીવ એકબીજાનાં પ્રેમમાં છે પણ વિચારભેદના કારણે તેઓ લગ્ન અંગે કોઈ નિર્ણય પર આવી શકતાં નથી. માનસીનું વલણ સ્ત્રીસ્વાતંત્ર્ય પ્રતિ ઢળેલું છે જેની સામે સંજીવને વાંધો છે. આ પરિસ્થિતિમાં માનસી સમાધાન કરવાનું વિચારે છે કારણ કે એને સંજીવ જોડેનો સંબંધ ટકાવી રાખવો છે. પણ કંઇક એવું બને છે કે માનસીને ચોક્કસ નિર્ણય લેવાની ફરજ પડે છે. એને સમજાય છે કે સમાધાન કરવાની પણ એક હદ હોય છે.

પ્રભાવી રજૂઆત, સારી વાર્તા.  

ધુમ્મસ (જયંત રાઠોડ):

અતિ વાસ્તવવાદની વાર્તા. પહાડી વિસ્તારમાં ટેક્સી ચલાવતા રામસિંઘને એના કાકાએ કહેલું કે સવારમાં જો કાળો કૂકડો દેખાય તો પહાડ ઊતરવો નહીં. એક સવારે કાળો કૂકડો જોયા પછી પણ રામસિંઘ કાકાની શિખામણને અવગણે છે. એ દિવસે એક પ્રવાસી જોડે એને ભારે અજબગજબ અનુભવો થાય છે.

રોમાંચક રજૂઆત. આપણે ત્યાં અતિ વાસ્તવવાદની વાર્તાઓ ખાસ લખાતી નથી એ સ્થિતિમાં આ વાર્તાનું સ્વાગત છે.     

નોકરી (હિરેન દેસાઈ):

દાંપત્યજીવનમાં પતિ દ્વારા વિશ્વાસઘાત.

માતાપિતાના વિરોધને અવગણીને રોશનીએ સામાન્ય સ્થિતિના રઘુવીર જોડે પ્રેમલગ્ન કર્યા હતાં. આખો દિવસ ઘરમાં રહીને કંટાળતી રોશનીને રઘુવીર નોકરી કરવાની મંજૂરી આપતો નથી. અમદાવાદની કોઈ કન્યા જોડે બીજા લગ્ન કરવા પૂર્વસૂચના આપ્યા વિના એ રોશનીને છૂટાછેડા આપવાનો હતો. પણ એવું આત્યંતિક પગલું એ લઈ શકે એ પહેલાં અકસ્માતમાં એનું મૃત્યુ થઈ જાય છે. અમદાવાદમાં રહેતી રઘુવીરની પ્રેયસીના પત્ર દ્વારા રોશનીને આ સમાચાર રઘુવીરના મૃત્યુ પશ્ચાત મળે છે. પતિની દગલબાજીની રોશની પર માનસિક અસર થાય છે.  

પ્રવાહી અને રસાળ રજૂઆત.   

તણખા હેઠળની ટાઢાશ (ચંદ્રિકા લોડાયા):

દાંપત્યજીવનની ખાટીમીઠી વાતો.

એક વરિષ્ઠ દંપતીની વાત. વાર્તા બે ભાગમાં રજૂ થઈ છે. પહેલા ભાગમાં કથક પતિ છે અને બીજા ભાગમાં પતિના અવસાન બાદ પત્ની કથક છે. બંનેની વાતોમાં એકબીજા પ્રત્યેની લાગણી અને ફરિયાદોની રજૂઆત થઈ છે.

સામગ્રીમાં કે રજૂઆતમાં વિશેષ નવીનતા નથી.

--કિશોર પટેલ, 20-03-23; 10:41   

###

(Disclaimer: આ લખાણ વાર્તાઓનું વિવેચન, સમીક્ષા કે રસાસ્વાદ નથી. આપણી ભાષામાં લખાતી સાંપ્રત વાર્તાઓની આ કેવળ એક દસ્તાવેજી નોંધ છે. અહીં રજૂ થયેલાં વિચારો જોડે સહમત થવું જરૂરી નથી. ભિન્ન મતનું સ્વાગત છે.)

###