શબ્દસૃષ્ટિ જુલાઈ ૨૦૨૩ અંકની વાર્તાઓ વિશે નોંધ

શબ્દસૃષ્ટિ જુલાઈ ૨૦૨૩ અંકની વાર્તાઓ વિશે નોંધ

(૩૫૯ શબ્દો)

આમાં આવું આવે (ગોરધન ભેસાણિયા)

સંવાદકથા.

જુગારીઓના ગામની વાત.

આ રચનામાં બે પાત્રો વચ્ચે વાતો થાય છે. બે પાત્રોમાંથી એક કથક અને બીજો શ્રોતા છે. કથક પરગામનો છે. એનાં ગામનાં લોકો જુગાર રમવાનાં રસિયા છે અને એમાં ઘણાં બરબાદ થઈ ગયાં છે. એ બધાં શુકનવંતા આંકડો જાણવા પરોપજીવી રખડુ બાવાઓની સેવા કરે છે.  કથકે જે બાવાની સેવા કરી એણે કોઈ ટીપ તો ના આપી ને ઉપરથી એને ગાળો દીધી એવો અનુભવ એ કહી જણાવે છે.

“આમાં એવું આવે.” કથકનો તકિયાકલામ છે.

વાર્તાની રજૂઆત હાસ્યપ્રધાન શૈલીમાં થઈ છે. આ વાર્તાકાર પાસેથી ગ્રામ્ય પરિવેશની સારી વાર્તાઓ સાતત્યપણે મળતી રહે છે.    

બે રેખાઓ (કિરણ વી. મહેતા)

ઘવાયેલી લાગણીઓની વાત.

વર્ષો પછી ગામ આવેલા દિનુભાઈ ખાલી પડેલું બાપીકુ ઘર વેચી નાખવા ઈચ્છે છે પણ ઘર જોડે સંકળાયેલી એક મીઠી સ્મૃતિને લીધે એમનો વિચાર બદલાય છે. દિનુભાઈને ગમતી ગૌરીના લગ્ન અન્યત્ર થઈ જાય છે. ગૌરીએ સાસરિયાંના ત્રાસને કારણે આત્મહત્યા કરવી પડેલી એવી જાણ થતાં જ દિનુભાઈ ઘર વેચીને કાયમ માટે ગામથી દૂર જવાનું નક્કી કરે છે. ટૂંકમાં, બે રેખાઓ ક્યારેય મળતી નથી. 

વાર્તામાં કથાનાયકની પીડાનું અને એના મનોભાવોનું આલેખન થયું છે.

સણકો (ડો. રમણ માધવ)

અપરાધભાવ.

માસ્તરથી કશુંક અણછાજતું કામ થઈ ગયું છે. એમને એક નાની કન્યા ધનીનો ડર લાગે છે. આ ધની કયાંક એમની પોલ ખોલી ના નાખે એ વાતે માસ્તર ડરી ગયા છે. તેઓ અચાનક જ જમીન પર ગબડી પડ્યા છે. નાનકડી ધની અને એનાથી ઉમંરમાં સ્હેજ મોટી પુષ્પા એમ બંને બાળાઓ માસ્તરને મદદ કરવા ઈચ્છે છે પણ માસ્તર છેક જ સંકોચાઈને કોચલામાં પૂરાઈ ગયા છે. તેઓ પોતાના મનની વાત કોઈને કહી શકતા નથી. પતિની ભોળા સ્વભાવની પત્ની કાન્તા પણ મૂઝાઈ ગઈ છે.

માસ્તર પોતાના હાથે થઈ ગયેલા છબરડાને સુધારવાના અનેક પ્રયાસો કરે છે પણ એમને સફળતા મળતી નથી. એમનાથી ચોક્કસ શું ભૂલ થઈ છે તેનું રહસ્ય છેક સુધી અકબંધ રાખવામાં વાર્તાકાર સફળ થયા છે. અંતની ચમત્કૃતિ અણધારી છે.

નાયકનાં મનમાં રહેલી ભીતિ, ડર અને દોષભાવનાનું સરસ આલેખન.   

ટ્વીસ્ટ અને ટર્નવાળી સરસ અને વાચનક્ષમ વાર્તા.

--કિશોર પટેલ, 06-08-23, 09:35

###

(Disclaimer: આ લખાણ વાર્તાઓનું વિવેચન, સમીક્ષા કે રસાસ્વાદ નથી. આપણી ભાષામાં લખાતી સાંપ્રત વાર્તાઓની આ કેવળ એક દસ્તાવેજી નોંધ છે. અહીં રજૂ થયેલાં વિચારો જોડે સહમત થવું જરૂરી નથી. ભિન્ન મતનું સ્વાગત છે.)

###