પરબ જુલાઈ ૨૦૨૩ ની વાર્તાઓ વિશે નોંઘ

 પરબ જુલાઈ ૨૦૨૩ ની વાર્તાઓ વિશે નોંઘ

(૨૫૪ શબ્દો)

છીંકાયણ (બકુલેશ દેસાઈ)

હાસ્યવાર્તાનાં મહોરાં પાછળ એક કન્યાની કરુણ કથા રજૂ થઈ છે.

બિંદુનાં બા જૂનાં વિચારનાં છે, શુકન-અપશુકનમાં માને છે. બા ઘરની બહાર નીકળતાં હતાં એ વખતે બિંદુને છીંક આવી એટલે બાને અપશુકન થયાં. બા દિવસભર નાનીમોટી વાત માટે બિંદુને સતત ટોકતાં રહે છે.

પોતાના સ્વાર્થ માટે બાએ બિંદુને એક નહીં બબ્બે વાર અન્યાય કર્યો છે. બિંદુને ભણવું હતું, એના ભણતરનો ખર્ચ મામા ઉપાડવાના હતા પણ બિંદુના વધુ ભણવા સામે બાને વિરોધ હતો એટલે એ ભણી ના શકી. પોતે એકલી પડી જાય તેમ જ દીકરીનાં ઘેર ના રહેવાય એવા જૂનાં વિચારોને લીધે તેઓ બિંદુના લગ્ન પણ થવા દેતાં નથી. બાકી પાડોશી દેવુકાકાનો દીકરો અને બિંદુ બંને એકબીજાને પસંદ કરતાં હતાં.

વાર્તાની રજૂઆત હળવી શૈલીમાં થઈ છે પણ આલેખનની કમાલ એ છે કે બિંદુની પીડા અછાની રહેતી નથી. વરિષ્ઠ વાર્તાકાર પાસેથી મળેલી સારી વાર્તા.     

શિંગડા (જેસંગ જાદવ)

બે બળુકી ભેંસ બાઝી અને એમનાં શિંગડા એકબીજામાં એવા ભેરવાયા કે એકના શિંગડા કાપ્યે જ છૂટકો થાય. ભેંસના માલિકો રેવો અને પૂંજો બંનેમાંથી એકે પોતાની ભેંસના શિંગડા કપાવવા તૈયાર નથી. બંને ભેંસની સ્થિતિ અત્યંત ગંભીર છે.

પાળેલા પ્રાણીઓ જોડે ઊભી થતી વિષમ પરિસ્થિતિની શ્વાસ અધ્ધર કરી દેતી રોમાંચક વાર્તા. વેગળો વિષય અને રહસ્યસભર સરસ રજૂઆત.

(નોંધઃ આ વાર્તા આ અગાઉ અખંડ આનંદના માર્ચ ૨૦૨૩ અંકમાં પણ પ્રગટ થઈ ચૂકી છે.)

--કિશોર પટેલ, 08-08-23 09:02

###

(Disclaimer: આ લખાણ વાર્તાઓનું વિવેચન, સમીક્ષા કે રસાસ્વાદ નથી. આપણી ભાષામાં લખાતી સાંપ્રત વાર્તાઓની આ કેવળ એક દસ્તાવેજી નોંધ છે. અહીં રજૂ થયેલાં વિચારો જોડે સહમત થવું જરૂરી નથી. ભિન્ન મતનું સ્વાગત છે.)

###